banniere
L'Assouciacoun Lis Ativeta Atualita Biblioutèco Li Sujèt Revisto
Sounotèco Caièr doucumentàri Liame


Celebra Jan-Enri Fabre

Jan-Enri Fabre èi nascu en 1823 dins un vilajoun dóu Rouergo, à Sant-Leouns, à l’uba e au couchant de Mihau.

Fabre

Fai d’estùdi un pau descourdura. Devers si 15 an se trobo quasimen fourça de trabaia pèr viéure. Pamens, en 1841, passo lou councous d’intrado à l’escolo nourmalo d’Avignoun, èi reçaupu proumié ! après l’escolo nourmalo, en 1843, es istitutour à Carpentrasd. Se marido emé Marìo-Cesarino Villars, istitutriço, auran 7 enfant, defuntara en 1885. Sènso jamai l’universita, de 1846 à 1855 passo dous bacheleirat, letro pièi sciènci ; en seguido 3 licènci : matematico, sciènci fisico, sciènci naturalo ; enfin lou dóutourat ès-sciènci. Ei proufessour de fisico à Ajaccio (1849-53) pièi au licèu d’Avignoun (1853-70).

En 1870 èi fourça de demessiouna de l’ensignamen pèr agué parla de la fecoundacioun di flour pèr lis abiho à de jouvènto dins de cous dóu vèspre, s’envai resta en Aurenjo (1871-79) e se counsacro à l’escrituro de manuau d’nesignamane (un centenau), la maje part publica vers l’editour Delagrave. En 1879 croumpo un pichot doumaine, que ié met «l’Armas», à Serignan (Vaucluso). En 1887 se remarido emé soun «gouvèr» Marìo-Jóusefino Daudel, a quaranto an de mens qu’éu ! Auran tres enfant.

Despièi soun sejour à Carpentras, s’èi sèmpre interessa is insèite ; en Aurenjo, à Serignan pièi se counsacro majamen à l’estùdi di mours dis insèite, d’à cha pau publicara dès voulume d’óusservacioun «Souvenirs entomologiques» (1878-1907). De mai a pinta quicon coume 600 eigarello representant de varieta de champignoun. A peréu escri de pouèmo e de cansoun, en francés emai en prouvençau (39 pouèmo e cansoun). Se saup pas ni mounte, ni coume, a apres la pinturo e la musico ? En 1888 s’èro amiga emé dous jouíni felibre : Anfos Martin e Louvis Charrasse, pièi en 1908 rescontro Frederi Mistral. Ero devengu Felibre, pièi Majourau dóu Felibrige en 1909 (cigalo de Carcassouno). En 1913 lou Presidènt de la Republico ié rènd vesito à soun Armas de Serignan. Lou 11 d’óutobre de 1915 defunto à Serignan ounte es esta ensepeli. I’a cènt an aquest an..

En 1868, Vitour Duruy, menistre de l’ensignamane, i’avié baia la legioun d’ounour, es esta nouma óuficié en 1910. Vertadier engèni, sèmbnlo que Fabre poudié realisa tout ço qu’entreprenié. Es esta lou vertadier foundadou de l’entoumoulougìo (estùdi dis insèite). Ei celère dins lou mounde entié, subretout en Russìo, Suèdo, Bèugico, Meissico, e mai-que-mai au Japoun ounte tóuti lis enfant legisson de passage de sis obro à l’escolo primàri.

Sa deviso èro «Laboremus», valènt à dire «Trabaian».

A escri «Ei moun sujèt favouri, que de pleideja l’afaire di feble, di miserous, di calounia, di foro-bandi … Touto ma vido me reprouchariéu d’óublida li leissa de caire.»

Noste Cèntre de doucumentacioun Prouvençalo tèn à la vostro dispousicioun mai de 200 referènci que mai o mens an Fabre coume siujèt, d’entre éli mai de 20 libre, e peréu un caièr doucumentàri de 25 pajo : « Jean-Henri FABRE » pèr 6 € mandadis coumpres.





deco de bas de page